ಹೇಳಲಾರೆಯಾ ಚಂದ್ರಮ,,,,,,,,,,,,,,,,,

ಹೇಳಲಾರೆಯಾ ಚಂದ್ರಮ 

ಎಂದು ಇನಿಯನ ಸಂಗಮ

ಅವನ ಬರುವಿಕೆಯ ನಿರೀಕ್ಷೆಯಲಿ 

ನೀರವ ಮೌನದ ಹಾದಿಯಲ್ಲಿ   

ಕನಸಿನ  ಹೂವುಗಳ ಚೆಲ್ಲಿ  

ಕಾದು ಸೋತಿದೆ ಮನವು  

ಬಳಲಿದೆ ನನ್ನೀ ತನುವು!

ಮುರಳಿಯ ನಾದಕೆ ಮರುಳಾದ 

ಆ ರಾಧೆ  ನಾನಾಗಲಾರೆ 

ರಾಮನ ಒಲವಿಗೆ ಕಾದ 

ಆ ಸೀತೆ ನಾನಾಗಲಾರೆ 

ಲಕ್ಷ್ಮಣನ ವಿರಹದಲಿ ಬೆಂದ  

ಊರ್ಮಿಳೆ ನಾನಾಗಲಾರೆ

ಕಂಬನಿಯೊಡನೆ ಬಾಳಲಾರೆ!  

ಪ್ರೀತಿಯ ಪುಷ್ಪಕ ವಿಮಾನವನೇರಿ 

ಆಗಸದಗಲಕೂ ಹಾರಬೇಕಿದೆ 

ವಿರಹದುರಿಯ ಸಂಗ ಸಾಕಾಗಿದೆ 

ಅವನ ವಿಶಾಲ ಎದೆಗೊರಗಬೇಕಿದೆ

ಬದುಕ ಪ್ರೀತಿ ಸುಧೆಯ ಹೀರಬೇಕಿದೆ          

ಹೇಳಲಾರೆಯಾ ಮುದ್ದು ಚಂದ್ರಮ 

ಎಂದು ನನ್ನಿನಿಯನ ಸಂಗಮ!