ಅದೆಂಥಾ ಭಯಂಕರ ಘಳಿಗೆಯೇ ಗೆಳತಿ,.......!!

ಎಂದೆಂದೂ ನನ್ನವರೆಂದು ಭಾವಿಸಿದ್ದವರೆಲ್ಲ ನನ್ನವರಲ್ಲ ಎಂದು ಅರಿವಾದಾಗ 

ನಂಬಿಕೆಯ ಬುಡವನ್ನೇ ಅಲ್ಲಾಡಿಸಿದ ಅದೆಂಥಾ ಭಯಂಕರ ಘಳಿಗೆಯೇ ಗೆಳತಿ, 

ಕ್ಷಣ ಮಾತ್ರದಲಿ ಹೃದಯ ಬಡಿತವೇ ನಿಂತು ಹೋದಂತಾಗಿ ಕಣ್ಣು ಕತ್ತಲಾಗಿ 

ಮುಂದಿನ ದಾರಿ ಕಾಣದಾಗಿ ಪ್ರಕ್ಷುಬ್ಧ ಕಡಲಿನಲಿ ಸಿಕ್ಕ ಒಂಟಿ ದೋಣಿಯಂತಾಗಿ 

ದಶಕಗಳ ಸಂಬಂಧಗಳು ಕ್ಷಣಮಾತ್ರದಲಿ ನಶಿಸಿ ಹೋಗಿ ಗುರುತೇ ಉಳಿಯದಾಗಿ 

ಯಾರಿಗೂ ನಾ ಏನೂ ಅಲ್ಲವೆನ್ನುವ ಮಟ್ಟಿಗೆ ಅಪರಿಚಿತನಾಗಿ ಬಾಳುವ ಘಳಿಗೆ 

ಅದೆಷ್ಟು ಕಷ್ಟವೇ ಗೆಳತಿ ಹೊಂದಿಕೊಳಲು ಪಲ್ಲಟವಾದ ಇಂದಿನ ಈ ಪರಿಸ್ಥಿತಿಗೆ

ಭ್ರಮೆಗಳೆಲ್ಲ ಮುಖವಾಡ ಕಳಚಿ ತಮ್ಮ ವಾಸ್ತವ ರೂಪವ ತೋರುವ ಈ ಘಳಿಗೆ 

ಏನೆನ್ನಲಿ ಗೆಳತಿ ಇದನು ಅಮೃತ ಘಳಿಗೆಯೆನಲೆ ವಿಷಪ್ರಾಶನ ಕ್ಷಣವೆನಲೆ 

ಹಾಲು  ಹಾಲಾಹಲವಾದಾಗ  ಸುಕೋಮಲ ಮನದಿ ಕೋಲಾಹಲವೆದ್ದಾಗ...!