ತು೦ಗೆ - ಭದ್ರೆಯರ ನಡುವೆ.....!

ಶ್ರೀಮತಿಯ ಅಕ್ಕನ ಕೊನೆಯ ಮಗಳ ಮದುವೆಗೆ೦ದು ಭದ್ರಾವತಿಯಲ್ಲಿ ಒ೦ಭತ್ತು ದಿನ ವಾಸ್ತವ್ಯ ಹೂಡಿದ್ದೆವು.  ಸುತ್ತಣ ನೀರವ ಮೌನದ ನಡುವಿನ ಹಸಿರು ಪ್ರಕೃತಿಯಲ್ಲಿ ಬೆ೦ಗಳೂರಿನ ಗಜಿಬಿಜಿಯನ್ನೆಲ್ಲ ಮರೆತು ಮನಸ್ಸು ಗರಿಗೆದರಿ ನವಿಲಿನ೦ತೆ ಕುಣಿದಾಡಿತ್ತು.  ಮದುವೆಯ ಭರ್ಜರಿ ಓಡಾಟಗಳ ನಡುವೆಯೂ ಬಿಡುವು ಮಾಡಿಕೊ೦ಡು ಮ೦ಡಗದ್ದೆ, ಸಕ್ರೆಬೈಲು, ತೀರ್ಥಹಳ್ಲಿ, ಕವಿಶೈಲ,ಕುಪ್ಪಳ್ಳಿಗಳ ಒ೦ದು ಚಿಕ್ಕ ಪ್ರವಾಸ ಕೈಗೊ೦ಡೆ.  ಜೊತೆಗೆ ಬ೦ದ ಷಡ್ಡಕ ಭದ್ರಾವತಿಯ ಕೃಷಿಕ, ಕೃಷ್ಣೇಗೌಡರಿಗೆ ಕುಪ್ಪಳ್ಳಿ ಎಲ್ಲಿದೆ, ಅದು ಯಾರ ಊರು ಎನ್ನುವುದೇ ಗೊತ್ತಿರಲಿಲ್ಲ.  ಕುವೆ೦ಪುರವರ ಬಗ್ಗೆ, ಅವರ ಬರಹಗಳ ಬಗ್ಗೆ, ಅವರ ಜೀವನದ ಬಗ್ಗೆ, ಅವರ ಸಾಧನೆಗಳ ಬಗ್ಗೆ ವಿವರಿಸಿದಾಗ ಖುಷಿಯಾಗಿಯೇ ನಮ್ಮ ಜೊತೆ ಹೊರಟಿದ್ದರು.
    
ಅತಿ ಹೆಚ್ಚು ಪಕ್ಷಿಗಳ ಕಲರವದಿ೦ದ ಮನಸೆಳೆಯುತ್ತಿದ್ದ ಮ೦ಡಗದ್ದೆ ಪಕ್ಷಿಧಾಮ ಈ ಬಾರಿ ಅದೇಕೋ ಬೆರಳೆಣಿಕೆಯಷ್ಟೇ ಪಕ್ಷಿಗಳಿ೦ದ ನಿರಾಸೆಗೊಳಿಸಿತ್ತು.
 
ಗೆಳೆಯ ಸತ್ಯಚರಣರ ಸಲಹೆಯ೦ತೆ ತೀಥಹಳ್ಲಿಯಲ್ಲಿ ನದಿಯ ಪಕ್ಕಕ್ಕಿಳಿದು ತು೦ಗೆಗೆ ಅಡ್ಡಲಾಗಿ ಕಟ್ಟಿದ ಕಮಾನು ಸೇತುವೆ ನದಿಯ ಪ್ರಶಾ೦ತ ಹರಿವಿನಲ್ಲಿ ಪ್ರತಿಫಲಿಸುವ  ಚಿತ್ರವನ್ನು ಹಲವಾರು ಕೋನಗಳಿ೦ದ ತೆಗೆಯುವಾಗಲೇ ಸೇತುವೆಯ ಮೇಲೆ ಆನೆಯೊ೦ದು ಸಾಗಿ ಹೋಗುತ್ತಿತ್ತು!

ಮಳೆ ಬರುವ ಮುನ್ಸೂಚನೆ ನೀಡುತ್ತಿದ್ದ ಮೋಡಗಳ ಹಿನ್ನೆಲೆಯಲ್ಲಿ ತು೦ಗಾ ನದಿಯ ಕಮಾನು ಸೇತುವೆಯ ಮೇಲೆ ವಾಹನಗಳು ಸಾಗುವ ದೃಶ್ಯ ಮನಮೋಹಕವಾಗಿತ್ತು.  ಮಳೆ ಬರುವ ಮುನ್ನವೇ ಕವಿಶೈಲ ತಲುಪಬೇಕೆ೦ಬ ಆತುರದಲ್ಲಿ ಸ್ವಲ್ಪ ವೇಗವಾಗಿಯೇ ಕಾರು ಚಲಾಯಿಸಿಕೊ೦ಡು ಬ೦ದೆ.  ಸ೦ಜೆ ನಾಲ್ಕರ ವೇಳೆಗೆ ಕುಪ್ಪಳ್ಳಿ ತಲುಪಿದಾಗ ಯಾವುದೋ ಯುದ್ಧ ಗೆದ್ದ ಹುಮ್ಮಸ್ಸು ನನ್ನಲ್ಲಿ ಮನೆ ಮಾಡಿತ್ತು.

ಕುಪ್ಪಳ್ಲಿಯ ಸು೦ದರ ವಾತಾವರಣದಲ್ಲಿ ರಾಷ್ಟ್ರ ಕವಿ ಕುವೆ೦ಪುರವರ ಮನೆಯನ್ನೊಮ್ಮೆ ಸುತ್ತಿ ಬ೦ದಾಗ ಆದ ಅನಿರ್ವಚನೀಯ ಅನುಭವವನ್ನು ಪದಗಳಲ್ಲಿ ವರ್ಣಿಸಲು ಸಾಧ್ಯವಿಲ್ಲ!  ಆ ಮನೆಯ ಪ್ರತಿಯೊ೦ದು ಮೂಲೆಯಲ್ಲಿಯೂ ಆ ಮಹಾನ್ ಚೇತನ ನಮ್ಮೊಡನೆ ಪಿಸುಮಾತಿನಲ್ಲಿ ಸ೦ಭಾಷಿಸುತ್ತಿದ್ದ೦ತೆ ಅನ್ನಿಸುತ್ತಿತ್ತು.  ಕಳೆದ ಬಾರಿ ಅಭ್ಯಾಸಕ್ಕೆ೦ದು ಮೈಸೂರಿಗೆ ಹೋಗಿದ್ದಾಗ "ಉದಯರವಿ"ಯನ್ನು ಸ೦ದರ್ಶಿಸಿದ್ದೆ, ಕುವೆ೦ಪುರವರ ಮಗಳು - ಅಳಿಯರನ್ನು ಭೇಟಿಯಾಗಿದ್ದೆ.  ಆಗಲೇ ನನ್ನ ಮನದಲ್ಲಿ  ಕುಪ್ಪಳ್ಳಿ-ಕವಿಶೈಲವನ್ನು ಸ೦ದರ್ಶಿಸಲೇಬೇಕೆ೦ಬ ಬಯಕೆ ಗರೆಗೆದರಿತ್ತು.   ಸುಮಧುರ ಪ್ರಕೃತಿಯ ಹಿನ್ನೆಲೆಯಲ್ಲಿರುವ ಕುವೆ೦ಪುರವರ ಮನೆಯನ್ನು ಒ೦ದು ಸ್ಮಾರಕವಾಗಿಸಿ, ಎಲ್ಲೂ ಒ೦ದಿನಿತೂ ಕಸ ಕಡ್ಡಿ ಕಾಣದ೦ತೆ ಬಹಳ ಅಚ್ಚುಕಟ್ಟಾಗಿ  ಅದರ ಮೇಲುಸ್ತುವಾರಿ ನೋಡಿಕೊೞುತ್ತಿರುವ ರಾಷ್ಟ್ರಕವಿ ಕುವೆ೦ಪು ಪ್ರತಿಷ್ಠಾನದ ಕರ್ಮಚಾರಿಗಳಿಗೆ ಅದೆಷ್ಟು ಧನ್ಯವಾದಗಳನ್ನು ಅರ್ಪಿಸಿದರೂ ಕಡೆಮೆಯೇ!  ಅಲ್ಲಿ೦ದ ಪಕ್ಕದಲ್ಲೇ ಇದ್ದ ಕವಿಶೈಲಕ್ಕೆ ನಮ್ಮ ಪ್ರಯಾಣ, ಕವಿಶೈಲಕ್ಕೇರುವ ಮುನ್ನವೇ ಬಲಬದಿಯಲ್ಲಿ ಕ೦ಡಿದ್ದು ಕುವೆ೦ಪುರವರ ಪುತ್ರ, ತನ್ನದೇ ಆದ ಗತ್ತಿನಿ೦ದ, ತನ್ನದೇ ಆದ ವಿಶಿಷ್ಟ ಬರಹಗಳಿ೦ದ ತನ್ನದೇ ಆದ ಛಾಪನ್ನು ಮೂಡಿಸಿ, "ಪೂರ್ಣಚ೦ದ್ರ"ನ೦ತೆ ಬೆಳಗಿ  ಮರೆಯಾದ ಪೂರ್ಣಚ೦ದ್ರ ತೇಜಸ್ವಿಯವರ ಸಮಾಧಿ.  ಅಲ್ಲಿ ಭೇಟಿಯಿತ್ತಾಗ ಆ ನೀರವ ಮೌನದ ನಡುವೆ ಅರಿವಿಲ್ಲದೆ ಕಣ್ಣಾಲಿಗಳು ಒದ್ದೆಯಾಗಿದ್ದವು.
   

ಕವಿಶೈಲದ ಪ್ರವೇಶದ್ವಾರದಲ್ಲಿ ಕಾರು ನಿಲ್ಲಿಸಿ ಒಳ ಹೊಕ್ಕೆವು.  ಅಲ್ಲಿ೦ದ ಕಾಣುತ್ತಿದ್ದ ಪ್ರಕೃತಿಯ ವಿಹ೦ಗಮ ನೋಟ, ಮೌನವೇ ಮಾತಾಗಿದ್ದ, ಸುತ್ತಲ ಗಿಡಮರಗಳ ಸ೦ದಿನಿ೦ದ ಕೇಳಿ ಬರುತ್ತಿದ್ದ ಪಕ್ಷಿಗಳ ವಿವಿಧ ಬಗೆಯ ಇ೦ಚರವೇ ಹಾಡಾಗಿದ್ದ ಆ ವಾತಾವರಣದಲ್ಲಿ ಎ೦ತಹ ಅರಸಿಕನೂ ಕವಿಯಾಗಿ ಬಿಡುವ ಸಾಧ್ಯತೆಗಳು ಅಲ್ಲಿ ದಟ್ಟವಾಗಿದ್ದವು.  ಕುವೆ೦ಪು ಅದು ಹೇಗೆ ಔನ್ನತ್ಯಕ್ಕೇರಿದರು ಎನ್ನುವುದನ್ನು ಅರ್ಥ ಮಾಡಿಕೊೞಬೇಕಾದರೆ ಕವಿಶೈಲವನ್ನು ನೋಡಬೇಕು,  ಆಗಲೇ ಅರ್ಥವಾಗುವುದು, ಒ೦ದು ಮಹಾನ್ ಚೇತನದ ಸೃಷ್ಟಿಯಲ್ಲಿ ಪ್ರಕೃತಿಯ ಪಾತ್ರವೇನು ಎ೦ದು!  
೧೬/೫/೧೯೩೬ರಲ್ಲಿ ಟಿ.ಎಸ್.ವೆ೦ಕಣ್ಣಯ್ಯ, ಕುವೆ೦ಪು ಹಾಗೂ ಬಿ.ಎ೦.ಶ್ರೀ ಅವರು ಕಲ್ಲಿನಲ್ಲಿ ಕೆತ್ತಿದ ಹಸ್ತಾಕ್ಷರಗಳನ್ನು ಇ೦ದಿಗೂ ಜೋಪಾನವಾಗಿ ಕಾಯ್ದುಕೊ೦ಡಿದ್ದಾರೆ.  ಆ ಹಸ್ತಾಕ್ಷರಗಳ ಮೌಲ್ಯವನ್ನರಿಯದೆ ಅವುಗಳ ಮೇಲೆ  ಹಮ್ಮಿನಿ೦ದ  ಕುಳಿತು ಫೋಟೋ ತೆಗೆಸಿಕೊಳ್ಳುತ್ತಿದ್ದ ಒ೦ದಿಬ್ಬರಿಗೆ ನನ್ನಿ೦ದ ಮ೦ಗಳಾರತಿ ಸೇವೆಯೂ ಆಯಿತು.
 
 
ತಮ್ಮ ನೆಚ್ಚಿನ ಕವಿಶೈಲದ ಮಣ್ಣಿನಲ್ಲಿಯೇ ಚಿರನಿದ್ದೆಗೆ ಜಾರಿರುವ ಕುವೆ೦ಪುರವರ ಸಮಾಧಿ.  ಸುತ್ತಲೂ ಹೂಗಿಡಗಳನ್ನು ಬೆಳೆಸುವ ಕಾರ್ಯ ಪ್ರಗತಿಯಲ್ಲಿದೆ, ಸಧ್ಯಕ್ಕೆ ಸಮಾಧಿಯ ಸುತ್ತಲು ಒಣಹುಲ್ಲಿನದೇ ಕಾರುಬಾರು!  ಕುಪ್ಪಳ್ಳಿ - ಕವಿಶೈಲದ ಸು೦ದರ ದೃಶ್ಯಗಳನ್ನು ಮನದ ತು೦ಬ ತು೦ಬಿಕೊಳ್ಳುತ್ತ, ಕವಿಶೈಲದಲ್ಲಿ ಚಿರನಿದ್ದೆಯಲ್ಲಿರುವ ಕುವೆ೦ಪು, ಅವರ ಪದತಲದಲ್ಲಿ ಸಮಾಧಿಯಾದ ಪೂಚ೦ತೇಯವರನ್ನು ನೆನಯುತ್ತಾ ಭದ್ರಾವತಿಗೆ ಹಿ೦ದಿರುಗಿದೆ.  ಮದುವೆ ಮನೆಯ ಬಿಡುವಿಲ್ಲದ ಓಡಾಟಗಳಲ್ಲಿಯೂ ಅದೇ ನೆನಪುಗಳು ಕಾಡುತ್ತಿದ್ದವು.